Bildu ditugun Euskal Artzain Txakurren lehen 178 aleen lagin biologikoak, Medical University of Innsbrucken Institute of Legal Medicine zentrora joango dira, Walter Parson doktorearen Ikerketa Taldeak garatutako 13 markatzaile genetikoen panelaren arabera aztertzeko (CaDNAP 13-STR panel).

Lagin horien analisia Euskal Artzain Txakurraren Adiskideak Elkarteak Euskal Herriko Unibertsitateko BIOMICs Ikerketa Taldearekin elkarlanean garatutako Euskal Artzain Txakurraren (EATAG proiektua) azterketa genetikoan kokatzen da.

Egiten ari garen azterlanean, laginak ISAG-en (International Society for Animal Genetics) gomendioei jarraituz aztertzen dira, ISAG-ek txakur-ale bakoitza identifikatzeko egokitzat jotzen dituen 18 markatzaile genetikoko panel baten arabera.

BIOMICS Ikerketa Taldeak Parson doktorearekin duen lankidetzari esker, Euskal Artzain Txakurra arraza proiektuan sartzea eskatu dugu, orain arte aztertutako txakur-aleak CaDNAP 13-STR panel berri honekin ere aztertu ahal izateko. Horrek areagotu egingo du ale bakoitza identifikatzeko gaitasuna, baita beste batekin oso ahaidetuta badago ere. Gainera, oso lagungarria izango da ahaidetasun-harremanak ezartzeko.

CaDNAP panelaren beste berezitasun interesgarri bat arrazaren iragarpena ahalbidetzen duen informazio gehigarria izatearena da.

Zer informazio ematen du CaDNAP panelak?

CaDNAP panelaren analisiak 23 txakur-arrazatan frogatu du arraza gehienak erraz bereiz daitezkeela CaDNAP paneleko 13 markatzaileekin, tartean Alemaniako artzaina, Golden Retriever eta Rottweilerra. Egitura genetikoaren azterketak arraza gehienek talde desberdinak osatzen zituztela erakutsi zuen (1. Irudia).

1.irudia. CaADNP profil genetikoen araberako multzoak Berger et al. (2018) aztertutako arraza ezberdinetan.

Hala ere, txakur-arrazak esleitzeko muga edo erronka batzuk ere azaldu ditu ikerketak. Hori, bereziki, ahaidetasun estua duten edo modu uniformean egituratuta ez dauden arrazei dagokie (1. taula).

1.taula. Ale bakoitzari dagokion arraza asmatzeko probabilitatea. Balioek baten araberako portzentzaia adierazten dute; ehunekoetan duten baliokidetasuna 100ez biderkatuta lortzen da. (Datuak Berger et al., 2018).

CaDNAP markatzaileen panelarekin egindako ikerketak Alemania, Austria eta Suitzako txakurretan egin ziren, eta, beraz, interesgarria da beste herrialde batzuetako arraza puruko txakurretara zabaltzea. Txakur mestizoek ere badute lekua proiektu honetan.

Hasiera batean, Ingalaterra eta Estatu Batuak izan dira lanean jarraitzeko proposatu diren herrialdeak, baina interesgarritzat jo da Euskal Artzain Txakurra bere bi aldaeretan sartzea, animalia bakoitzari buruzko informazioa behar bezala jasota dagoelako, besteak beste.

Honengatik guztiagatik, orain arte ISAG-ek onartutako 18 markatzaileko panelarekin aztertutako aleak CaDNAP panelarekin ere aztertu ahal izango ditu Innsbruckeko Parson doktorearen taldeak.

Honek, ale bakoitzari buruzko informazio gehigarria emango digu, baita Euskal Artzain Txakurra arrazari buruzkoa ere.

Bibliografia

Berger B, Berger C, Heinrich J, Niederstätter H, Hecht W, Hellmann A, Rohleder U, Schleenbecker U, Morf N, Freire-Aradas A, McNevin D, Phillips C, Parson W. Dog breed affiliation with a forensically validated canine STR set. Forensic Sci Int Genet. 2018 Nov;37:126-134. doi: 10.1016/j.fsigen.2018.08.005. Epub 2018 Aug 16. PMID: 30149287.