Urte gorabeheratsu bat amaitu da, tristurarako arrazoi gehiegi izan dugun urtea, baina alaitasunerako aukerak ere aurkitu ditugu.

Urtea beti bezala hasi genuen, otsailaren 3an Abadiñoko San Blas azokara joanez. Egun ederra benetan, jende askok bisitatu gintuen, berea hila zegoelako  EAT baten bila zebilen pandero jole ospetsu bat, adoptatu nahi zuten neska bat eta baita artzain eta abeltzainak ere, eta ez genuen barkatu txorizo taloa eta  Jon eta Ana Añibarroren gazta-pastelak dastatu gabe ere, oso onak.

Inork ez zukeen aurreikusiko hilabete pasatxoan gure bizitza erabat aldatuko zenik. Martxoaz, Apirilaz eta Maiatzaz zer esanik ez…

Eta Ekainaren 19a iritsi zen, bidaiatu genezakeen eta normaltasun berriak (termino beldurgarria) ahalbidetzen zituen gauzak ere egin genitzakeen, baina ordura arte ezagutzen genituen azokak kanpoan geratu ziren. Beraz, ezin izan genuen gure txakurrekin azoketara eta Artzai Egunetara joan, Idiazabal, Araia, Mungia, Amaiur, etab…  pazientzia dena iritsiko da.

Baina Ekaina ez zen hobea izan, kosta egin zen gure lagun, lankide eta lehendakari Jon Laparraren galera onartzea. Abisatu gabe joan zen, diskretu, baina ilusioz eta energiaz betea, proiektu berriak aurrera ateratzeko, beti laguntzeko prest, egun batzuk lehenago esan zigun bezala.

Bien bitartean,  Euskal Artzain Txakurraren azterketa genetikoa izoztuta zegoen, lagin-bilketak behera egin zuen joan-etorriak egiteko zailtasunengatik, baina etengabe jaso ditugu posta elektronikoak eta parte hartzeko eskaerak, eta horiei erantzuna ematen ari gara pixkanaka.

Irailean argazki lehiaketa urte beltz bati kolore pixka bat jartzera etorri zen. Hemendik,  berriz ere eskerrak eman nahi dizkiegu parte-hartzaileei eta argazki irabazlea aukeratzeko zuen botoekin laguntzen duzuen guztiei. Jasotako argazkiek osatzen dute gure 2021eko egutegia, eta erostera animatzen zaituztegu, gure proiektuen finantzaketan laguntzeko.

Eta ezer espero ez genuenean, Urria eta Azaroa iritsi ziren, eta hilabete horietan dena irauli zen bi gertaera aipagarriren ondorioz:

Lehenengoa urrunetik datorren lan baten emaitza da, non sinergiak batzea eta eraikitzea lehenetsi den. Urriaren 20an lankidetza-hitzarmen bat sinatu genuen Euskal Herriko Artzain Txakurren Txapelketa Antolatzaileen Elkarteak (EHATE) eta Euskal Artzain Txakurraren Adiskideak Elkarteak (EATA). EHATEko kideen eta beren gertukoen EAT arrazako txakurrek azterketa genetikoan parte hartzea errazten du akordioak.

Lankidetza horri esker, gaur egun abeltzaintzako ustiategietan lanean ari diren EAT-en lagin asko azterlanean sartzeaz gain, baterako proiektuak egiteko atea ireki da.

Bigarren gertakaria azaroaren 11n izan zen, Biomics Ikerketa Taldearen mezu bat jaso genuenean. Bertan, Innsbruckeko Unibertsitatearekin akordio batera iritsi direla jakinarazi ziguten, EAT-en laginak unibertsitate hau 13 markatzaile genetiko berriren panel batekin lotuta egiten ari den proiektu berri batean parte har dezaten. Markatzaile berri horiek aurrerapausu izugarri bat dira txakurren genetikaren azterketan, eta baita EAT-aren ezagutzan ere; izan ere, markatzaile berriek aukera ematen dute profil genetikoan oinarritutako arraza-multzoak ezartzeko.

Azken batean, uste dugu albiste ona dela Iletsuen eta Gorbeiakoen 178 laginek nazioarteko proiektu garrantzitsu honetan parte hartzea. Proiektu horren emaitzek Euskal Artzain Txakurra arrazari buruzko informazio garrantzitsua emango digute.

Azkenik, Euskal Artzain Txakurraren Adiskideak Elkarteak eta bertako kideek eskerrak eman nahi dizkiegu proiektu honetan zuzenean eta zeharka parte hartzen duten pertsona guztiei: laginak hartzen dituzuenei, laginak aztertu eta tratatzen dituzuen ikertzaileei, EAT-ek egunero lan egiten duten lekuetara iristen laguntzen duzuenoi, zuen klinikak eskura jartzen dizkiguzuen albaiteroei, egutegiak eta loteria erosten duzuenoi, etabar luze bati, den denoi eskerrik asko.

Euskal Artzain Txakurraren berreskurapena denon elkarlanarekin bakarrik lortuko dugu, hori da gakoa.

GABON ZORIONTSUAK OPA DIZKIZUEGU eta 2021. URTE ZORAGARRIA IZAN DEZAZUELA.